أنا وحسنى مبارك وقناة سبيستون

نظرا لان كل الوسائل التكنولوجية الحديثة لها عيوبها الخطيرة بجانب مميزاتها
اعتقد ان اغلس عيوب الدش والستلايت كجهاز تكنلوجي فى بتنا المصون
هو قناة سبيستون واخواتها mbc3 الجزيرة للاطفال - artteens - وما يستجد

ونظرا لاننا قسمنا مشاهدة القنوات بالتساوي
انا نص ساعة
وهم نص ساعة برضه بس بس نص ساعة كبيرة شوية

ونظرا لان دورى فات من اكثر من 3 ساعات
قررت اخذ موقف مع ابناء اختى الذين هرشوا ام دماغى بحلقات المتحولون وبيكنى وبيرن وبات مان وقلت بصوت ملىء بالجدية

كفاية كده يا ولادالـ .... يا ولاد اختى
دوركم خلص
دورى انا بقى
انا لي 3 ساعات مستني

بدت حالة من القرف والامتعاض على وجوههم موحيا برسالة مضمونها(انت هتزهقنا فى عشيتنا ولا ايه )

استلمت الراية
اقصد الريموت فى حالة من الفرحة والاشتياق واخذت فى تحويل القنوات
انتابتني حالة من النشوة نتيجة الحرية التى كنت اتمتع بها اثناء تحويل القنوات
يااه شعور جميل بالحرية ... دورى بقى وانا حر فيه

ونظرا لاننى مقاطع كل القنوات القومية والحكومية خوفا من ان تقع عيني صدفة على بعض المشاهد التى حذرنى الطبب
من مشاهدتها مثل (السيد الرئيس محمد
-السيدة قرينته ام جمال
- الباشمهندز احمد خفيف
- السيد فتحى كركور
- والسادة باقى افراد الشلة المبجلة)

خوفا من اثارمشاهدتهم ا السلبية من ارتفاع ضغط الدم
او حدوث الجلطة لا قدر الله
او ربما الحساسية احيانا
واقلها حالة اكتئاب حاد

قررت المغامرة اليوم ومحاولة اختلاس بصة على احدى قنوات النخع القومى

والنخع فن راقي وهام ويحتاج الى مهارات (لمزيد من التفاصيل عن معنى النخع انظر قاموس الالفاظ المروشنة )

استغربت في البداية عندما صدمت بسحنة سيادته الرائعة (سحنة تغم النفس على راي كتكوت )
لكن بمجرد ان رايت وجهه على الشاشة بدات في سرد المناسبات القومية
هو احنا النهاردة اول مايو ولا 23 يوليو ولا 6 اكتوبر

ايوه 6 اكتوبر
تمام نسمع
ايه ده
دا مش خطبة

دا سيادته مشرفنا في الصعيد
جميل
وكمان بيفتح مشروعات
ربنا يفتح عليه كمان وكمان

اعلم ان حالة الوئام والسلام النفسي الداخلي التى حصلت عليها جراء وصول دورى في الريموت وان انا اشوف اللى انا عاوزه مش هتستمر كتير
بدات غلاسة الوحوش اقصد براءة الاطفال تعكر على فرحة دورى اللى مستنيه من 3 ساعات

ولان توتة بنت اختى 8 ( سنوات واحلى اخواتها كما يقولون ) تعيش اليومين دول حالة انها كبيرة وفاهمة كل حاجة

بدات تعيش معي هذه الحالة السياسية

توتة : خالو

انا : عامل نفسي مش سامع

توتة بصوت اعلى : خالو خالو

انا: ايوه نعم

توتة: مش هو ده حسنى مبارك

انا وبقرف يختلط باستغراب : ايوه هو

توتة : انا عارفاه هو ده الريس صح

انا : حمدت الله انا الحوار يبدو انه سهلا واوشك على الانتهاء فدورى بقى عليه ربع ساعة وينتهى

توتة : خالو

انا: يا نعم

توتة : لكن يا خالو هو حسنى مبارك رئيس من زمان

انا : ايوة

توتة : يعنى يا خالو زمان قوى قوى لما كنت انا صغير ة(على اساس انه عندها 200 سنة ) كان مين رئيس الجمهورية

انا : كان حسنى مبارك يا حبيبتى

توتة: يااه ، طيب زمان زمان خالص قبل ما انا ما اتولد لما كان حمادة (الاخ الاكبر بخمس سنوات) لما كان حمادة صغير مين كان رئيس الجمهورية

انا : الله يطولك يا روح برضه هو يا توتة السيد الرئيس محمد حسنى مبارك

توتة: طيب قبل ما حمادة يتولد يا خالو مين كان رئيس الجمهورية (على اساس ان حمادة من عصر الملك امنمحات الاول)

انا: وبدات اشعر بحالة من النرفزة من كتر ما سمعت وقلت كلمة مبارك ... لكن معلش اهو برضه من حق الجيل الجديد علينا انه يعرف تاريخه
ايوة يا توتة برضه كان حسنى مبارك

توتة: وبدا يحدث لها نوع من الاسبهلال ممزوجا بالتحدى وبدا الصوت يرتفع و يحتد الحوار (طيب انت يا خالو لما كنت صغير مين كان رئيس الجمهورية (قالتها فى حالة من التحدى )

انا: بكل اسف وحزن لاننى ساخيب املها ( برضه يا توتة كان حسنى مبارك )

توتة: بنرفزة واستعجاب وعدم تصديق وصوت اعلى وشبه خروج عن الوعى (يا سلام .. ناقص تقوللى ان حسنى مبارك كان رئيس الجمهورية قبل ما انت تتولد كمان (كان نفسي تقوللى قبل ما حضرتك تتولد .. لكن معلش مش هي دي المشكله برضه انت او حضرتك المحصلة واحدة هو هو مفيش غيره حسنى مبارك )

انا :طأطأت رأسي لاعلى واسفل وبخجل شديد (أيوه .. صحيح )

توتة: منفجرة (انت بتضحك علي )

انا : لا والله انا يا توتة اتولدت زيك لقيت حستى مبارك رئيس الجمهورية

توتة: وبدأ لمعان التفكير والامعية والعبقرية يلمع في عينيها ( هو يا خالو رئيس الجمهورية لازم يكون حسنى مبارك

انا: اتلخبطت ومعرفتش اقوول ايه (والله ... يا توتو هو مش كده بالضبط .. بس تقدرى تقولى كده ... بس هو مش كده ... هو كده ومش كده .. يعنى ... اصلى....باقول لك ايه لما تكبرى هتفهمى

توتة: هو نا لما اكبر هافهم يا خالو

انا: روحى ردت لى لان واضح ان الحوار خلاص هينتهى على سلام (طبعا يا حبيبتى اكيد لما تكبرى هتفهمى )

توتة : طيب يا خالو لما اكبر هيفضل برضه حسنى مبارك رئيس الجمهورية

انا: لا يا حبيبتى مش للدرجة دى اكيد هيكون مات

توتة : خالو هو حسنى مبارك اكبر ولا جدو اكبر

انا: حسنى مبارك اكبر يا حبيبتى من جدو

توتة : طيب اكبر قد ايه

انا: 20 سنة

توتة : طيب يا خالو لما يموت حسنى مبارك هنعمل ايه

انا : عادى يا حبيبتى الموت علينا حق

نط كابتن جمادة اللى مش فالح غير فى الكورة لينهى الحوار
وبكل مصداقية وتعبيرات وجه موحى بحالة سياسية ووطنية

حمادة : يا بت انتى عبيطة
لما حسنى مبارك يموت خلاص مش هيبقى فى حاجة اسمها رئيس الجمهورية (بفتح الجيم )

انتهى المشهد الدرامي السياسي
وراح دورى

اخذتنى سنة من السرحان والحسرة على حال بلدنا اللى بتتقدم بينا
فقت منها على همس طفولى
توتة : خلاص يا لوله( اختها التوام ) انا نسيتهولك دوره .. انت عليك الدور المرة الجاية لما ييجى دوره في التلفزيون

استيقظت من غفلتى بصوت عالى بس داخلي واكتشفت الخدعة الطفولية المتوحشة التى وقعت فيها

يا ولااااد الكــ.......
انتهى