أنا وحسنى مبارك وقناة سبيستون

نظرا لان كل الوسائل التكنولوجية الحديثة لها عيوبها الخطيرة بجانب مميزاتها
اعتقد ان اغلس عيوب الدش والستلايت كجهاز تكنلوجي فى بتنا المصون
هو قناة سبيستون واخواتها mbc3 الجزيرة للاطفال - artteens - وما يستجد

ونظرا لاننا قسمنا مشاهدة القنوات بالتساوي
انا نص ساعة
وهم نص ساعة برضه بس بس نص ساعة كبيرة شوية

ونظرا لان دورى فات من اكثر من 3 ساعات
قررت اخذ موقف مع ابناء اختى الذين هرشوا ام دماغى بحلقات المتحولون وبيكنى وبيرن وبات مان وقلت بصوت ملىء بالجدية

كفاية كده يا ولادالـ .... يا ولاد اختى
دوركم خلص
دورى انا بقى
انا لي 3 ساعات مستني

بدت حالة من القرف والامتعاض على وجوههم موحيا برسالة مضمونها(انت هتزهقنا فى عشيتنا ولا ايه )

استلمت الراية
اقصد الريموت فى حالة من الفرحة والاشتياق واخذت فى تحويل القنوات
انتابتني حالة من النشوة نتيجة الحرية التى كنت اتمتع بها اثناء تحويل القنوات
يااه شعور جميل بالحرية ... دورى بقى وانا حر فيه

ونظرا لاننى مقاطع كل القنوات القومية والحكومية خوفا من ان تقع عيني صدفة على بعض المشاهد التى حذرنى الطبب
من مشاهدتها مثل (السيد الرئيس محمد
-السيدة قرينته ام جمال
- الباشمهندز احمد خفيف
- السيد فتحى كركور
- والسادة باقى افراد الشلة المبجلة)

خوفا من اثارمشاهدتهم ا السلبية من ارتفاع ضغط الدم
او حدوث الجلطة لا قدر الله
او ربما الحساسية احيانا
واقلها حالة اكتئاب حاد

قررت المغامرة اليوم ومحاولة اختلاس بصة على احدى قنوات النخع القومى

والنخع فن راقي وهام ويحتاج الى مهارات (لمزيد من التفاصيل عن معنى النخع انظر قاموس الالفاظ المروشنة )

استغربت في البداية عندما صدمت بسحنة سيادته الرائعة (سحنة تغم النفس على راي كتكوت )
لكن بمجرد ان رايت وجهه على الشاشة بدات في سرد المناسبات القومية
هو احنا النهاردة اول مايو ولا 23 يوليو ولا 6 اكتوبر

ايوه 6 اكتوبر
تمام نسمع
ايه ده
دا مش خطبة

دا سيادته مشرفنا في الصعيد
جميل
وكمان بيفتح مشروعات
ربنا يفتح عليه كمان وكمان

اعلم ان حالة الوئام والسلام النفسي الداخلي التى حصلت عليها جراء وصول دورى في الريموت وان انا اشوف اللى انا عاوزه مش هتستمر كتير
بدات غلاسة الوحوش اقصد براءة الاطفال تعكر على فرحة دورى اللى مستنيه من 3 ساعات

ولان توتة بنت اختى 8 ( سنوات واحلى اخواتها كما يقولون ) تعيش اليومين دول حالة انها كبيرة وفاهمة كل حاجة

بدات تعيش معي هذه الحالة السياسية

توتة : خالو

انا : عامل نفسي مش سامع

توتة بصوت اعلى : خالو خالو

انا: ايوه نعم

توتة: مش هو ده حسنى مبارك

انا وبقرف يختلط باستغراب : ايوه هو

توتة : انا عارفاه هو ده الريس صح

انا : حمدت الله انا الحوار يبدو انه سهلا واوشك على الانتهاء فدورى بقى عليه ربع ساعة وينتهى

توتة : خالو

انا: يا نعم

توتة : لكن يا خالو هو حسنى مبارك رئيس من زمان

انا : ايوة

توتة : يعنى يا خالو زمان قوى قوى لما كنت انا صغير ة(على اساس انه عندها 200 سنة ) كان مين رئيس الجمهورية

انا : كان حسنى مبارك يا حبيبتى

توتة: يااه ، طيب زمان زمان خالص قبل ما انا ما اتولد لما كان حمادة (الاخ الاكبر بخمس سنوات) لما كان حمادة صغير مين كان رئيس الجمهورية

انا : الله يطولك يا روح برضه هو يا توتة السيد الرئيس محمد حسنى مبارك

توتة: طيب قبل ما حمادة يتولد يا خالو مين كان رئيس الجمهورية (على اساس ان حمادة من عصر الملك امنمحات الاول)

انا: وبدات اشعر بحالة من النرفزة من كتر ما سمعت وقلت كلمة مبارك ... لكن معلش اهو برضه من حق الجيل الجديد علينا انه يعرف تاريخه
ايوة يا توتة برضه كان حسنى مبارك

توتة: وبدا يحدث لها نوع من الاسبهلال ممزوجا بالتحدى وبدا الصوت يرتفع و يحتد الحوار (طيب انت يا خالو لما كنت صغير مين كان رئيس الجمهورية (قالتها فى حالة من التحدى )

انا: بكل اسف وحزن لاننى ساخيب املها ( برضه يا توتة كان حسنى مبارك )

توتة: بنرفزة واستعجاب وعدم تصديق وصوت اعلى وشبه خروج عن الوعى (يا سلام .. ناقص تقوللى ان حسنى مبارك كان رئيس الجمهورية قبل ما انت تتولد كمان (كان نفسي تقوللى قبل ما حضرتك تتولد .. لكن معلش مش هي دي المشكله برضه انت او حضرتك المحصلة واحدة هو هو مفيش غيره حسنى مبارك )

انا :طأطأت رأسي لاعلى واسفل وبخجل شديد (أيوه .. صحيح )

توتة: منفجرة (انت بتضحك علي )

انا : لا والله انا يا توتة اتولدت زيك لقيت حستى مبارك رئيس الجمهورية

توتة: وبدأ لمعان التفكير والامعية والعبقرية يلمع في عينيها ( هو يا خالو رئيس الجمهورية لازم يكون حسنى مبارك

انا: اتلخبطت ومعرفتش اقوول ايه (والله ... يا توتو هو مش كده بالضبط .. بس تقدرى تقولى كده ... بس هو مش كده ... هو كده ومش كده .. يعنى ... اصلى....باقول لك ايه لما تكبرى هتفهمى

توتة: هو نا لما اكبر هافهم يا خالو

انا: روحى ردت لى لان واضح ان الحوار خلاص هينتهى على سلام (طبعا يا حبيبتى اكيد لما تكبرى هتفهمى )

توتة : طيب يا خالو لما اكبر هيفضل برضه حسنى مبارك رئيس الجمهورية

انا: لا يا حبيبتى مش للدرجة دى اكيد هيكون مات

توتة : خالو هو حسنى مبارك اكبر ولا جدو اكبر

انا: حسنى مبارك اكبر يا حبيبتى من جدو

توتة : طيب اكبر قد ايه

انا: 20 سنة

توتة : طيب يا خالو لما يموت حسنى مبارك هنعمل ايه

انا : عادى يا حبيبتى الموت علينا حق

نط كابتن جمادة اللى مش فالح غير فى الكورة لينهى الحوار
وبكل مصداقية وتعبيرات وجه موحى بحالة سياسية ووطنية

حمادة : يا بت انتى عبيطة
لما حسنى مبارك يموت خلاص مش هيبقى فى حاجة اسمها رئيس الجمهورية (بفتح الجيم )

انتهى المشهد الدرامي السياسي
وراح دورى

اخذتنى سنة من السرحان والحسرة على حال بلدنا اللى بتتقدم بينا
فقت منها على همس طفولى
توتة : خلاص يا لوله( اختها التوام ) انا نسيتهولك دوره .. انت عليك الدور المرة الجاية لما ييجى دوره في التلفزيون

استيقظت من غفلتى بصوت عالى بس داخلي واكتشفت الخدعة الطفولية المتوحشة التى وقعت فيها

يا ولااااد الكــ.......
انتهى

عندما يؤلمنا الأمل ... ونأمل بالألم

عندما يؤلمنا الأمل ... ونأمل بالألم

لأن الحياة تأبى أحيانا أن تسير على نفس وتيرتها

قد يحدث احيانا ما لايحدث دائما
فقد يحدث احيانا

ان نتالم من الأمل ويؤملنا الالم

ان نتالم من الامل

هل تذكر يوم ان كنت مراهقا يافعا جديد في دنيا الكبار

كم من الاحلام راودتك

وكم من الامال تعلقت بها

كل منا لون حياته بازهى الاوان وابدعها

كم كان املك اول عام في كليتك

بل كم من الامال كتبناها وخططناها يوم تخرجنا

لكن في هذه الحياةلا يتحقق فيها شىء لأنك تمنيته

ولا حتى تعلقت به

مهما كان املك

ومهما كان تعلقك

ثم يستيقظ الغافل منا على اماله تتكسر واحلامه تضيع وطموحاته تتلاشى

يجلس ليحسب كم اخذ من امانيه

فيجد انه تعدى الصفر بمراحل

عندها يتالم الواحد منا اشد الالم وابشعه

وينقم ويلعن كل امل وطموح في هذه الحياة

يلعن امالا سببت له الاما ولسان حاله يقولليتنى ما املت ولا تالمت

نعم ليتنى ما املت ولا تالمت

ايتها الحياة

بينى وبينك هدنة

دعيني بلا الم

وساتركك انا بلا امل

هل جربت ان تعيش تلك الهدنة

جربت انا

هدنة لا امل مقابل لا الم

لكنى فى كل مرة اعقد الهدنة

اشعر بعدها اننى فقدت ادميتى

وتحولت الى ميكنة ماكينة لا تصنع شىء تدور بلا هدف

تستهلك وقود العمر لتخرج لاشىء

لكن واضح ان الانسان منا قد ادمن هذا النوع من الالام فسرعان ما يمنى نفسه بزوال الالم

ليبدأ دورة جديدة من الامال والطموحات ... بكل امل ان تتحقق

ولأن الحياة تأبى أحيانا أن تسير على نفس وتيرتها

قد يحدث احيانا ما لايحدث دائما

وقد يحدث احيانا ان يؤملنا الالم

والاعجب ان الالم قد يثير في النفس الامل

امل التخلص منه ... بل امل التعالي عليه
وكم من عجيب اختراعات البشر خرجت من عمق الالم

لقد اخترعت المصابيح في دياجير الظلام

وتقدم الطب واكتشفت الامصال والتطعيمات من الم المرض

وتحررت الاراضي من قلب الاستعمار

وكم نالت الشعوب حريتها من وسط الظم والاستبداد

بل خرج نور الاسلام من وسط مجمع الاصنام والوثنية

وانا وانت .. كم مرة صنعت نجاحا بعد فشل لا يوصف

وكم مرة دفعك الالم الذى كنت في البداية تسعى ان تتخلص منه فاذا بك تكتشف ان المك كان رحمة وانما المك دفعك الى خير حيث كنت لا تدريه ولا تخطط له

فالم ضيق العيش يدفع للغربة تخلصا منه فاذ به يصتع ثروة

والم فراق الحبيب يدفعك الى احضان محب حقيقي لتكتشف انك كنت موهوما فى حبك الاول

وكم صنع الم السجن رجال الدعوة

كما صنع الم الغربة والبعد عن مكة دولة الاسلام التى بلغت المشرق والمغرب

انى لا زلت اذكر الم اللطمة التى تلقيتها على وجهى وانا غلام من معلمي لخطا لغوي في حصة اللغة العربية
فقد صنعت تقدير امتياز مع مرتبة الشرف في كليتي

ان الم الافلاس سبعة مرات صنع والت ديزني

والم احتلال القدس صنع صلاح الدين قديما واحمد يس والرنتيسي حديثا

بل ان الم احتلال ال مبارك لمصر وانتهاكهم ادمية اهل مصر سيصنع باذن الله حريتنا ويعيد لنا مجدنا ويدفعنا الى طريق الله

وهكذا الحياة بحكمة الله تدور بين الم وامل

امل يحدث الم والم يصنع امل

اضحك مع اللهجات المصرية

اضحك مع اللهجات المصرية

ما اجمل ان تكون الطرفة واقعية وحدثت بالفعل

واللهجات المختلفة قد تصنع مواقف كوميدية مهلكة من الضحك ودون قصد
لقد جمعت مجموعة من الطرائف الواقعية التى حدثت بسببب اللهجات واختلافها بين المحافظات المختلفة او بين الاقطار المختلفة

واليك بعضا منها

ارجو من السادة القراء ان يحاولوا قراءة ونطق ما ساكتبه
==================================
فى قرى نجع حمادى بمحافظة قنا ، لا تزال لهجات بعض قرى نجع حمادى غريبة ومختلفة كما سترون خاصة كبار السن

ذهب صديقى الى بعض اصحابه ليزوره بقريته طرق الباب وفتحت له الست الحاجة
صديقى : السلام عليكم يا حاجة
الست الحاجة : وعليكم السلام يا وليدي
صديقى : مصطفى موجود يا حاجة
الست الحاجة : مصطفى دركييت مشكه ابيييييين هواتي (نطقتها بسرعة شديدة )
صديقى : نعم يا حاجة بتكلميني
الست الحاجة : بجولك (بقول لك ) مصطفى دركيت مشكه ابييييييين هواتي
صديقى (وهو فى قمة الاحراج لانه لم يفهم ماذا تقصد ) : طيب فين سيد يا حاجه
الحاجة : سيد ابللكوتي
صديقى : نعم الحاجة (وهى فى حالة من الضيق لهذا الغبىالذى لا يفهم او الاطرش الذى لا يسمع ) : سيد ابللكوتي
صديقى : طيب مع السلامة يا حاجة وسلميلى عليهم ، وانصرف وهو لم يفهم ماذا حدث
الترجمة
(دركيت ) دلوقت (مشكه ) كلمة من مقطعين الولى (مشا ) اى مشى يعنى ذهب ، الثانيه (كه) اسم اشارة بمعنى هكذا
(ابيييين هواتى ) بعييد هناك
ابللكوتى ) يعنى موجود قريب من هنا
وعجبا على اللهجات

==========================

سمع بعض اصدقائى هذا الحوار بين اثنين من قري نجع حمادى

الاول : مرجبتش كربان (والجيم هنا من نوع جلنا وجالوا اى قلنا وقالوا )

الثاني : دكهيتي هنيكه (بتشديد الكاف) ابيينو ( بتشديد الباء )

الترجمة
(مرجبتش ) اى مشفتش /من المراقبة يقصد( الم ترقب )(كربان ) واحد ماشى مستعجل (دكهيتي ) ضمير يعود على الرجل الكربان او المستعجل اى (هاهو )(هنيكه ) اسم اشارة بمعنى هناك (ابينو ) من البيان والظهور اى مر من قريب ولا يزال يبان ويرى من بعيد

==================================

دخل احد المرضى فى احدى قرى محافظة قنا على الدكتور الجديد فى الوحدة الصحية والدكتور بحراوي كما يقول اهل الصعيد على اهل الدلتا ةالقاهرة الكبرى
المريض : دكتور انا عندي سعال
الطبيب : الف سلامة عليك
ودخل الطبيب ليناوله زجاجة دواء شرب مهدئ للسعال والكحة ، بينما الفرحة من داخله ان اهل هذه البلده مثقفون ويتكلمون بشكل علمي الطبيب ( وهو يناوله الزجاجة )

الدكتور : اتفضل يا سيدي
المريض : يا دكتور بجوللك عندى سعااال عندي سعااال
الطبيب : ايوه ما انا عارف الدوا ده ان شاء الله هيريحك
المريض : يا دكتور بقولك عندى سعال عاوز اسعلهولك (اى عندى سؤال عاوز اساله لك )

=========================================

اتصل الطبيب الذى جاء لتوه فى القافلة الطبية بصديقه الاخر الصيدلى واخبره انه ربما يصادف بعض العبارات التى لا بفسر معناها من لهجة اهل القرية لذا سيتنصل به ويستشيره اذا لزم الامر ورد الصيدلي انه مستعد طبعا لانه من اهل الصعيد ويعرف لهجتهم

ودخلت احدى العجائز على الدكتور

العجوز : يا دكتور الظيظ مللحضة مندللو المشروع اتحميو واتجيو
الدكتور : ايوه يا حاجة بتشتكي من ايه
العجوز : يا دكتور الظيظ مللحضة مندللو المشروع اتحميو واتجيو
الدكتور : يعنى ايه اللى واجعك بالضبط
العجوز (وهى قمة فى الغيظ لغباء هذا الدكتور) يا دكتور الظيظ مللحضة مندللو المشروع تحيميو وتجيو

استدعى الدكتور صديقه الصيدلى ليترجم له

الصيدلي : ايوه يا حاجة
العجوز : مش تجبولنا دكتور بيتكلم عربي كل ما اجلله يا دكتور الظيظ مللحضة مندللو المشروع اتحميو واتجيو يجوللى مش فاهم

وبعد فترة بدا يفهم الصيدلى كلام العجوز

وترجم للدكتور
(الظيظ) اولادى الصغار(مللحضة) من ساعة (مندللو) ما نزلو (المشروع) الترعة (اتحميو) ارتفعت حرارتهم كانها حمى (واتجيو ) تقيئو ما فى بطونهم
وقال الصيدلى للكتور : بتقول لك اولادها الصغار من ساعة ما نزلوا يستحمو فى الترعة ارتفعت حرارتهم وتقيئوردت العجوز : اهو كل ما اجله كده يا ولدى يجولى مش فاهم امال دكتور ازاى بجى

======================================

فتح احدهم صيدلية فى احدى قرى الصعيد وكان شكل الصيدلية بلافتتها الضوئية وفاترينة الزجاج اللامعة ومستحضرات التجميل التى تعرض فى فتارينها كل هذا كان حدثا فريدا فى القرية
دخل احدهم على الدكتور
الرجل :السلام عليكم
الصيدلي :وعليكم السلام
الرجل : عندك ( اهديد تسديل )
الصيدلي : نعم
الرجل بجولك عندك ( اهديد تسديل )
الصيدلى : حضرتك عاوز ايه
الرجل بصوت مرتفع : بجوللك عندك ( اهديد تسديل ) ايه معتفهمش ولا اييه
اخبره المساعد الذى يقف مع الدكتور فى الصيدلية بيقولك عندك هد تسجيل كاسيت
الصيدلى : يا بلدينا دى صيدلية
الرجل بحالة نرفزة : يعنى عندك ولا معندكش
الصيدلى : لا معنديش
الرجل : طيب عوز (دخلي عدل)
الكتور (مسبهلا ) : نعم !!!!!!!!!!
الرجل : بجولك (دخلى عدل دخلي عدل ) اييه مفهمهاش دى كمان
الصيدلى : ايوه انا فاهم ان حضرتك عاوز تاخد حاجة فى العضل بس ايه اسم الحقنة )
الرجل : يا بووووى ، بقولك (دخلى عدل) يعنى الدواااانى الدوااااني الدواني بتاع العدلة فهمت
اخبره المساعد انه يريد الاطار الداخلي لعجلات السيارة (جوانى العجلة )
الصيدلي : يا بلدينا دى صيدلية
الرجل بنرفزة اشد : ايوه ، يعنى عندك ولا معندكش
الصيدلى : لا والله معنديش
الرجل : ايوه كده جول معنديش كل هبابه تجوللى سيدلية سيدلية تجولش يعنى فاتح ازدخانه يا اخوى (اى اجزخانة )

==================================================

دخل احدهم على الصيدلية البيطرية حاملا فوق كتفيه عنزته
يا دكتور الاجيلها علاج عندك ولا اطلع بيها على اسيوط
===============================

شرب الخرروب في فنون الهروب

شرب الخروب في فنون الهروب

الهروب من الهروب

لأن الحياة مقلب كبير

ولان الدنيا اكبر خازوق أخذه أغلب البشر

ولان إنهاء الحياة أمر لا يملكه أحد

كما أن تفصيل الحياة على أمزجتنا أمر غاية في الصعوبة

لجأ البشر من قديم الزمان إلى الهروب من هذا الخازوق وهذا المقلب الكبير

والهروب هو الوسيلة الأسهل على الإنسان من إجراءات أخرى اكثر صعوبة

مثل التكيف أو التعايش أو (والشر بره وبعيد ) التغيير

والهروب هو الوسيلة الأكثر شيوعا عند البشر

والهروب فنون

لكل شعب طريقته في الهروب

ولكل عصر أسلوبه

ولكل شريحة من المجتمع لونها المفضل في الهروب

ولكل مشكلة أو ضغط نفسي له نوعه من الهروب المخصص له

هناك الهروب الحلال

وهناك الهروب الحرام

هناك الهروب المحترم

وهناك الهروب الخسيس

هناك الهروب من المشكلات وهناك الهروب من الهروب

دعنا نرصد فى السطور القادمة (كيف يهرب الإنسان )

هناك هروب المليونيرات او الأثرياء

وهو أسرع وسيلة للهروب على الإطلاق وهو (الانتحار )
وهو الوسيلة الوحيدة التي لا تراجع فيها

ينتشر بكثرة في المجتمعات التي يزداد فيها المادة والثروة ويقل أو ينعدم الإيمان بالله

وهناك الهروب إلى العمل أو الشغل

وهى الطريقة الأكثر شيوعا للمتزوجين واصحاب الأسر واصحاب الضغوط العائلية والاخفاقات العاطفية

وهى حالة من إدمان العمل وقضاء ساعات كثيرة فيه والانهماك في تفاصيله والانشغال العقلي والنفسي الكامل به

ويلجا أيضا كثير من رجال العمال إلى هذه النوع من الهروب محاولة للهروب من الفشل في باقي جوانب حياتهم المختلفة كالعائلة

أو محاولة للهروب من ضمائرهم التى أرهقوها وخالفوها كثيرا فى جمع أموالهم

أما وسائل هروب الطلاب الشائعة فهي معروفة لكل من مر بهذه المرحلة

يبدأ احتياج الطالب في الهروب مع قرب الامتحانات
ويختلف الطلاب في اختيارهم لنوع الهروب المفضل
هناك من يشعر بهجمات أو نوبات نوم شرسة تجعله ينام (عمال على بطال)

ويحطم الكثير من الطلاب أرقاما قياسية من النوم المتواصل قبيل الامتحانات تصل ل 12 ساعة عند البعض

وينام( الطالب من دول ) كثيرا أثناء النهار محاولاً إقناع نفسه انه كان سهران طول الليل

ليكتشف انه قد خدع نفسه وان إجمالي حصيلة مذاكرته لا تتعدى الثلاث ساعات وبدون تركيز(خاصة مع التوقيت الصيفي الذي يقلص فترة الليل)

أما طلاب الفرقة الرابعة

فلديهم نوع لذيد من الهروب وهو التفكير المستمر في الزواج وهو ما كنا نسميه ونحن طلاب (شوطة الجواز)

وينتاب الطالب هذا الشعور بمناسبة قرب انتهاء أكبر سبب كان يمنعه لخوض هذه التجربة وهو الدراسة

إلا أن نوعا آخر من الهروب الغير لذيذ بالمرة ينتاب طلاب الفرقة الرابعةوهو التفكير في المستقبل والبطالة المنوحشة التى سيواجهها هذا الطالب بعد التخرج

ولا داعي للغرابة عندما تجد الطالب (ربنا يفتح عليه) بعشرات الأفكار النيرة والألمعية للعمل بعد التخرج طالما انه سيهرب بهذه الأفكار من كابوس مذاكرة 15 كتاب على مذكرة

أما طلاب الفرق الأولى والثانية

فيحلو فجأة فى أعينهم الكتب الخارجية وتتحرك ضمائرهم نحو الاهتمام بالثقافة العامة والمتخصصة

ويا حبذا لو زيارة معرض أو اثنين من معارض الكتب والتي يحرص الطالب على زيارتها وقضاء( ييجي 3 ساعات ) في رحايها الطيبة ولا تكاد تجد لذة وتركيز واستمتاع بالقراءة اكثر منه في فترة قبيل الامتحانات

لدرجة أن يشتاق الطالب لبدأ الإجازة ليلتهم بعض الكتب التي اشتراها خصيصا للقراءة في الإجازة والتي غالبا لا يراها مرة ثانية إلا في نفس التوقيت من كل تيرم

أما الغير مهتمين بالثقافة

فيفاجأ بان علاقاته العاطفية قد تحسنت إلى حد كبير

وان عقدة لسانه قد فكت

وصار شاعرا ورومانسيا كبيرا (مع الحته الحلوة بتاعته )كما أن( الحته الحلوة بتاعته ) اللى كانت (مطنشاه ومش مدياه ريق حلو )تبدا تلين وترق إليه (لانها الاخرى بدأ معها موسوم الهروب )ويهرب كليهما(الطالب والحته الحلوة بتاعته )

الى كبائن ميناتل او تحويل الرصيد المستمر من زيرو حشرة او شركة ام منبيل للاستمتاع باوقات عاطفية نادرة ولذيذة لا تكاد تكرر الا فى نفس التوقيت من التيرم

اما عامة الطلاب

فتشهد ساحات البليستيشن ومقاهى الانترنت مسرحا كبيرا للهروب

فتمتلأ المنتديات اللي كانت( بتهوى على نفسها طوال العام )وتعمر غرف الدردشة بينما يفجر البلايستيشن مواهبا مدفونة وطاقات جبارة لدى ابناءنا الطلاب

آما الآنسات الأمامير (جمع أمورة )

اللاتي يهاجم تفكيرهن شبح العنوسة (مش قلة حلاوة منهم والله لكن قلة رجالة )فيكون العمل والبحث عن وظيفة وعمل المقابلات الشخصية واعداد السفيهات(جمع CV )

مسكنا كبيرا يبعد شبح الأنوثة عن أذهانهن

كما أن مباركة ماما تدفع وتشجع البنت ( اللي قعدتها فى البيت ركنة )أما طلوعها برة خير محدش عارف يمكن ابن الحلال يشوفها رايحة مقابلة لشركة أو جاية من مقابلة في شركة واهو نصيب يا بنتي

بينما تمثل مراكز تعليم اللغات والكمبيوتر منتدى عاما للهاربين من الجنسين

الأولاد الهاربين من شبح البطالة والذين اقنعوا أنفسهم تماما أن باجتياز الرخصة الدولية لقيادة الحمير أو ما يسمى IDDLهي الفرصة الأكبر للعمل في مصر والدول العربية

والبنات الراجيات (العتور) فى ابن الحلال (أنا شخصيا أشجع جدا هذا النوع من الهروب المحترم )

أنا شخصيا مارست ألوانا من الهروب اعتقد أن الكثير يشاركني في بعضه

عندما تشتد الأزمات الداخلية فى المنزل الذى يتحول في أعلب الاحيان إلى فرع من السرايا الصفرا اهرب وبقوة إلى العمل المتواصل والذي يصل إلى 14 ساعة عمل يوميا
بعد فترة ومع الركود الاقتصادي والروتين المتعفن في هذه البلدة اللي يوقف المراكب السايرة وبمساعدة أولاد الحلال (الداخلية)

يبدا الفتور ينتابني من العمل المستمر

لابدأ أنا في هروب جديد الهروب إلى النوم وبكثرةوبعمق وبقوة

أياما وأمل من هذا النوع من الهروب الكائن في أول غرفة شمال في شقتنا وهى غرفتي الخاصة

لينتقل مقر الهروب إلى الصالة حيث اكثر من 240 قناة على قمري النايل سات والعرب ساتلتبدا الدراما المصرية والسورية تلعب الدور الأكبر للهروب من واقع الحياة الكئيب إلى أحداث هذه المسلسلات الممتعة التي تجعلك تعيش في عبق الماضي وأيام الزمن الجميل بعد فترة من متابعة بعض المسلسلات الممتعة مثل (حديث الصباح والمساء – رأفت الهجان – ليالي الحلمية – باب الحارة

لاحظت أن هذا النوع من الهروب مؤلم وله آثار جانبية مش حلوةوهو المرارة القاسية التي أفيق عليها بعد غفلة ساعة أو اكثر مع أبطال المسلسل لاكتشف أن شيئا مما كنت اعيش فيه لم يكن ولن يكن وان الواقع مرير

لهذا عدلت هذا النوع من الهروب
نعم (أفلام الرعب والخيال العلمي )إن الشعور الذي سأشعر به عند متابعة هذا اللون من الدراما من خوف وقلق وهلع ونكد سوف يتلاشى ويتبدد عقب انتهاء الفيلم من دول لآخذ نفسا عميقا عقب انتهاء الفيلم و أقول ياااهالحمد لله انه كان فيلمويحل على شعور آخر جميل ومطمئن واحساس بالسعادة(إني ممتش من الوحش العملاق في الفيلم )

قناة MBC2 شاركت بمجهود رائع ومشكور لمساعدتي في هذا النوع من الهروب المفتكسإلا أنى احب أن اوجه الشكر إلى الكاتب والأديب الكبير أنيس منصور صاحب كتاب (أرواح وأشباح)حيث كان كتابه جرعة مساعدة مع أفلام الرعب

إلا أنى بعد فترة أدمنت هذا النوع من الهروب وفقدت تأثيره الهروبي على حفظت اغلب أفلام الرعبأتستطيع التنبؤ بأحداث الفيلم قبل أن يبدأانتهيت من قراءة اغلب كتب القصص المرعبة المباعة عند ( عم خليل بتاع الجرايد اللى على أول الشارع )

لذلك وجب على وفورا إيجاد نوع آخر من الهروب المفتكس خاصة وأنى جربت أنواع الهروب التقليدية الكلاسيكية

ثمة نوعين محترمين ومبتكرين من الهروب توصلت إليهما قريبا

سأذكرهما آخر مقالتي (اللى مش عاوزة تخلص)

المصريون هم اكثر شعتوب الارض ممارسة للهروب

ظروف حياتهم اليومية وظروف حكومتهم الجأتهم الى ذلك

لا ينكر أحد دور الحكومة في مساعدة الشعب المسكين على الهروب

وللحكومة المصرية تجارب رائدة في مساعدة الشعوب على الهروب

• 
  
  
  إن زراعة مئات الأفدنة من ارض سيناء بالحشيش والماريجواناوتسهيل استيراد أنواع جديدة من البودرة وبرشام الخيال العلمي التي لم تعد تحوق في أم أدمغة هذا الشعب الحديدي المصفح
  لم تعد هذه التسهيلات بالزراعة والاستيراد مجدية الان ولم تعد تسد حاجة هذا الشعب على الهروب
  وبدأت إبداعات الحكومة المصرية تتوالى


• 
  
  
  فكرة بطاقات التموين أو مهزلة بطاقات التموين التي تستدعى عمل بطاقة رقم قومي بسبعة جنيه ونصكانت إحدى الأفكار البديعة للحكومة في وسائل الهروب
  واقسم بالله العظيم أنى رأيت وشاهدت وعاينت بنفسي مبيت الناس والعجائز والمرضى أمام السجقات المدنية (على راى عوكل ) فى عز برد الشتاء على الرصيف انتظارا لفتح السجل المدني ليكونوا اول المتقدمينورأيت طوابير تصل والله العظيم لاثنين كيلو متر
  برغم اعتبار البعض أن هذه الطوابير مهزلة إلا اننى اعتبرها من إحدى وسائل الهروب


• 
  
  
  طوابير العيش أيضا لا شك انها وسيلة مدروسة لمساعدة الشعب على الهروب
  فقضاء المواطن عدة أسابيع أمام الطابور من دول نوعا من تغيير الجوكما أن للطوابير ميزة أخرى لم يلتفت إليها أحدالطوابير لها بعد اجتماعي إن الطوابير فرصة ممتازة ليعيد المواطن علاقته لجيرانه وأصدقاء منطقته بل هي فرصة ليتعود هذا الشعب على التعايش والتلاحم والتحابب

ثمة معانى تربوية أيضا تريد ان توصلها الحكومة للشعب عبر الطوابير كوسيلة تربوية

وهى ان ينقطع الإنسان عن دنياه وأولاده وعائلته ومشاكله وكل البلاوي اللي في الدنيا

واهى فرصة ليحاسب الإنسان نفسه ويندم على أخطاء الماضي ويجدد عزمه وعهده مع الله ويعيد التفكير في حياته من جديد

كما أن الطوابير لها دور في التربية الجهادية والعسكرية للمواطنين

وقوف المواطن ساعات وأيام طويلة تحت أشعة الشمس وأمام حرارة الفرن وفى وسط رائحة العرق المنبعثة من إبط المواطنين زملائه نوع من التعود على الخشونة وكما قال واحد صاحبي (اخشوشنوا فان النعمة قد لا تدوم )

حتى موضوع التوريث ما هو إلا موضوع اختلقته الحكومة محاولة أن نهرب فيها من مشاكلنا (لكن ما بيطمرش فينا )
شوفت بقى إحنا كنا ظالمين الحكومة قد اد إيه

أخيرا سأعلن امام حضراتكم عن أحدث وسائل الهروب
(الفجوة) !!!!!!!!!!!!!!

وهى احدث أنواع الهروب فهو الهروب من الهروب نفسه لأن بعد فترة يمل الإنسان من وسائل الهروب المتعددة فيلجا إلى وسيلة ممتازة ليهرب فيها من الهروب نفسه

وهى فجوة عبر الزمان والمكان بمعنى هي منطقة غير موجودة في الزمن يعنى لا في الماضي ولا في الحاضر ولا في المستقبلوكمان فجوة عبر المكان يعنى مش موجودة في حتة

(آه بدينا الجنان )
لا والله الصبر شويه
الفجوة دى أهم حاجة فيها ان اللي يدخلها لن يشعر بأية مشاكل على الإطلاق لان ببساطة مفيش حاجة أصلا عشان تعمل مشاكل

أنا عارف ان الموضوع صعب جبتين لكمن سأحاول التوضيح

يعنى يا بطل مفيش مشكلة امتحانات لان مفيش أصلا تعليم
ومفيش مشكلة بطالة لان مفيش حاجة اسمها شغل أصلا
ومفيش أزمات اقتصادية لان مفيش فلوس أصلا ولا حد يعرفها ولا يتعامل معها
ومفيش أكل لان مفيش جوع
ومفيش عكننة مراتك ولا قرف جوزك لان مفيش جواز أصلا
ومفيش مشكلة حكومة لان مفيش ريس
ومفيش جمال لان مفيش مبارك أساسا
يعنى مفيش حاجة أصلا علشان يتعمل عليها مشكلة
فقط حالة من السلاموالوئام والسكينة والراحة

الفجوة دى موجودة داخل كل عقل بشري ؟!!يا بخت اللي يوصلها
لكن مشكلة صغير أو ضريبة بسيطةاللي يوصل للفجوة دى بيتغير شويتين ؟؟؟؟؟
يعنى محدش يتخض !!!!!!!!!!!1
تقريبا بيتقال عنه انه مجنون

لكن دا كلام الناس المجانين اللي مش فاهمين ومش حاسبين بالنعيم اللي هم فيه
أما العقلاء اللي زيينا فعارفين إنها الفجوة

أو الهروب من الهروب


أما الوسيلة الثانية ففي مقالة تالية ان شاء الله

عندما يبيض الانسان

عندما يبيض الانسان

سالتنى بنت اختى ( لولا .. هكذا نسميها ) سؤالا وجيها

لولا = خالو ممكن اسال سؤال

انا = نعم

لولا = هى ليه الفرخة بتبيض؟؟؟

انا = علشان يطلع كتكوت

بنت اختى = لا ان اقصد ليه بتبيض مش بتولد زى ماما وزى البنى ادمين

وفورا جاء فى ذهنى سؤالا اكثر وجاهه

وهو ليه الانسان ميبيضش اصلا ؟؟؟ ويبقى زي الفرخة

لكن بالفعل ماذا يحدث عندما يبيض الانسان

اكتشفت انه ستتغير بعض الامور فى حياتنا البشرية

===========================

* سوف يكتب فى البطاقة تاريخ الفقس

* وسيقول الواحد منا انا من مفاقيس شهر مايو

* وسيحتفل الناس بعيد فقسهم

* لن يكون هناك ولد ولا والدين سيكون هناك فقس وفاقس وفاقسة ( اللى هما الفاقسين ) اي الوالدين

* سوف يكون التخصص الطبي فى كليات الطب ( نسا وتفقيس )

* سوف تضطر الامهات الى الرقد على البيض بدلا من الحمل

* سوف يتصل بك صديقك الذى واعدك بانه سياتيك اليوم للزيارة( معلش والله اصل مراتى راحت مشوار ضرورى وانا اضطريت ارقد على البيض لغاية مترجع لحسن البيض يتهوا )

وعندما يكون الموعد ضرورى جدا سيتصل بك صديقك( معلش يا اخواننا يا ريت الزيارة النهارده تكون عندى اصل مراتى بره وانا راقد على البيض لغاية ما تييجى )

* سيكون لحظة فقس البيض اجمل خبر فى حياتنا وسنحتفل جميعا للمفقوس الجديد

* سنجد اعلانات امام الصيدليات

تعلن عن الراقد الالى

لا قلق بعد اليوم

الراقد الالى سيحل لك المشكلة

اذهبي الى عملك وانت مطمئنة

سيقوم الراقد الالى بالرقد على البيض وكانه ام حنون

لا داعى ان تطلبى من زوجك الرقد على البيض مؤقتا بدلا منك

الراقد الالى حل لك المشكلة

وحيبقى اللي اسمه وليد = "فقيس"

!وحيتحط العيل (قصدي الفقس ) في سلة بدل اللفة !

وممكن بدل ما المفاقيس يدخلوا حضانة يدخلوا عشة !

*الاهم من ذلك

سوف يستمر السيد الرئيس محمد حسنى مبارك قائدا وزعيما وريسا للبلد

ذلك لان بعض اصدقائي كل ما اشكو له زهقى الشديد من الريس

يقول والله لو الشعب باض برضه هيفضل ريس

وبالتالى لو كان الانسان يبيض فسيظل الريس ريس

وسلم لى على الكتاكيت

على العموم الحمد لله ان الانسان بيولد

هاه

حد لاحظ ان ممكن يكون فى تغير اخر عندما يبيض الانسان

ودي كانت نهاية اول وآخر حكاية حب فى حياتي

أول أخر حكاية حب في حياتي

(حب غير تقليدي)

كنت يومها في الصف الثاني الثانوي
سافرت مع أبى وأمي إلى الإسكندرية صيفا لقضاء صيفا شبه سعيدا بالنسبة لهم
وصيفا مملا بالنسبة لي
لان انا الوحيد من أخواتي اللي كنت باوافق أروح معاهم والباقي برفض رفضا باتا أو بيكون مشغول وطبعا عائلتنا عائلة ديمقراطية وده جه على راسى

المهم نرجع لنسيم الإسكندرية
وبين شطين وميه

ويأتي علي الليل ممل كالعادة

خرجت إلى البالكونة التي لا تطل على الشارع الرئيسي بل التي تطل على شارع جانبي وتطل على الجيران

دخلت البلكونة وزعت بصري على كل ما هو أمامي بسرعة شديدة كعادتي لاستكشاف سريع للمنطقة

فجأة !!

وقعت عيني على واحد قاعد قدامى في البلكونة اللي قدامنا
اتكسفت أوى
حسيت انه كان شايفنى وأنا عامل فيها بريمو في البلكونة

اتكسفت وحطيت عيني في الأرض
وبراحة
بصيت تانى لاكتشف انه مش واحد

دى واحدة
بنوته

لعب نسيم إسكندرية في دماغي
وقلت ياواد اهى حاجه حلوة ممكن تسليك شوية
ضميرى طلع فجأة من بنطلوني وزعق وقل لي أنت بتعمل ايه أنت هتبصبص

ريحت ضميرى شوية وقلت له لا معاذ الله لكن لكن ..!!
ضميري قال لكن ايه ؟
قلت لا ولا حاجة مقصدش دى صدفه


غلبني ضميري وأجبرني على أن أحط راسى وعيني في الأرض شاعرا في كل لحظة ان ضميري ماسك سنجه لو رفعت عيني هيطير راسى
دخلت الشقة ونمت

وتانى يوم بالليل قلت ادخل اشم شوية هوا
(طبعا انا كان نفسى اتملى من الامورة الحلوة أو اللى اظن انها اكيد حلوة بسرعة قبل ما يهجم ضميرى)

قعدت افكر في الحكايات اللى كنت باسمعها عن بنت الجيران
وان كل ابن جيران لا زم يحب بنت الجيران بتاعته كانه عرف وتقليد ثابت
كل شوية اغفل ضميرى وابص بصة صغيرة على الامورة

كل مرة بحجة
مرة اعمل فيها باهرش
مرة مش واخد بالى
مرة عاوز ابص في السما
وكل مرة اشوف شوية

النور كان خافت قوى لكن كنت كل شوية ادقق اكتر واحاول اكتشف جمال البنونه

عجبنى جدا شعرها الجميل
اجمل ما فيه انه كان بيتحرك مع الهوا زى الحرير
عجبتنى وقفتها المايلة وحطة ايديها على خدها

عجبنى هدوءها

شوية بشوية بقيت ابص اكتر عليها
نفسى اعرف تفاصيل اكتر عنها
غلبنى النوم ودخلت نمت افكر فيها

رأيتها فى منامي عشت معاها فيلما رومانسيا طويلا اقصد حلما طويلا


تالت يوم وبسرعة بعد التمشية مع بابا وماما دخلت البلكونة
شوفتها قاعده
استغربت !
قلت هى عارفه ان انا هادخل البلكونة دلوقت
يا ترى دى صدفه ولا انا برضه عجبتها

فضلت ابص عليها ورغم الضوء البسيط استطعت ان اكتشف تفاصيل اكتر

استطعت ان ارى جمالها وحسنها وبراءتها العجيبة

انها دايما موجودة في الوقت ده
ودايما مايلة على سور البلكونة
ودايما حطة ايديها على خدها
يوم ورا يوم
ونفس الحال بس كل مرة اتخيل انى باكلمها وانها بترد علي لدرحة انى سمعت منها مشاكلها كنت حاسس
انها جميلة بس حزينة

بعد 15 يوم قررت انا مش هادخل انام هستناها لما تدخل هى
وقعدت
الوقت اتاخر بس اصريت

الفجر اذن برضه قعدت

وقلت لنفسى اخيرا الصبح هيشقشق
اخيرا هشوف حبيبتى في النور

قلبى بدا يدق بقوة

بدا النور ييجى من بعيد قوى

شوية شوية بدا اول شعاع نور يشق الضلمة

وشوية

ياااه


ايه ده


مش معقول


مش ممكن



ايه اللى بيحصل ده


لالا
معقول ده



ادعك عنيه اكتر واكتر


ايه ده



ايه اللى انا شايفه ده


انا هعيط


يا لهووىىىىى




عارفين انا كنت بحب ايه



زلعة مسنودة على الحيطة متغطية بشال نصفه مربوط عليها ونصفه طاير في الهوا
لكن والله بالليل شكلها يوحى تماما انها بنوته
حاولت امتصاص الصدمة
قررت بعدها الا احب
بل لا انظر اساسا لاى زلعة
مين عارف
مش يمكن اى زلعة من بعيد تطلع بنوتة وانا مش عارف

أنا وحمادة والكورة

أنا وحمادة والكورة

المصريون مصابون اليوم بهوس اسمه الكورة

وبدات مجموعة من الاعراض من ضغط الدم

وامراض القلب

بل والوفاة احيانا

جراء هذا التعصب الكروي

واقرا يوميا واستغرب واسبهل من هذه المصيبة التى وصل لها المصريون والعرب والمسلمون

والمصيبة تبقى اكبر ولكبر

لما واحد مثلى ميفهمش حاجة فى الكورة

وكل علاقته بها ان لما يجيب قناة فيها ماتش يبقى لازم يحول القناة

انا بقى مصيبتى وحيرتى اشد

ومش قادر اعرف ايه اللغز العجيب ومش مصدق كل ردور الافعال الغريبة من الجمهور

لدرجة انى شكيت ان الامر مهم بالفعل وانا مش واخد بالي

وقررت ان اكون اهلاويا او زملكاويا (بس مش عارف لانى قررت على كبر)

وقررت اعمل ورد اسبوعى لمشاهدة مباريتان كرة قدم على الاقل

ونظرا لانى مدرب واقدر قيمة التدريب

طلبت من حمادة (ابن اختى ولا عب الكرة المشهور فى الشارع بتاعه) بعد ما قدمت كارت شحن

لموبايله هديه لزوم الرضا عنى

وطلبت منه انه يدينى كورس مكثف فى الكورة

نظر حمادة (فى الصف الثانى الاعدادي ودونجوان المدرسة بلا منافس) نظرة كلها شذر وقال مينفعش يا خالوا

رديت وقد دق قلبى وتحشرج لسانى ليه يا دودو

بص لى بصة اكثر احتقارا من الاول يشوبها شوية اشفاق

يعنى يا خالوا كنت فين السنين دى كلها

بعد ما كبرت وبقيت كبير وضيعت عمرك فى التعليم والدراسات اللى ملهاش لزوم (هو بصراحة لم يقل كده بالنص انما فيما معناه)جى دلوقت وتقول علمنى كورة

اخرجت الموبايل من جيبى فى حركة اغراء (الموبايل طبعا هو اللى عامل اغراء مش انا يا محترم)

فى تلميح مغرض انه من الممكن ان اتركه له الموبايل بتاعى كام يوم لزوم الرسم والشياكة على اللى بالى بالك

بص لى بصة اخرى وقال

والله يا خالوا هو انت علمتنى زمان ان مفيش حاجة صعبة

وان كل شىء ممكن بس بالصبر والمذاكرة

يلا يا خالو

قلت على فين

قال لى اول درس

قلتله هاه هنلعب مباراة

قال لى لا مش للدرجه دى اسال وانا اجاوبك

قلتله بصراحة يا حمادة انا عندى سؤال محيرنى حبتين ومحرج اسال

قال اسال متتكسفشى يا ابو السماسم (عدتها طبعا لان لما تكون ليك عند حمادة حاجة تقوللوا يا كابتن)

قلتلوا هو ليه دايما باحس ان الماتش كانه خناقه على كورة واحدة ونص اللى بيلعبوا عاوزين يدخلوها فى الشبكة والنص التانى على جثته ما هى داخله

ليه يا كابتن حمادة متكونش فى الملعب كورتين ولا تلاته

بص حمادة مبحلقا

واكملت

وليه ياكابتن بدل الزنقه والبهدله ميعملوش 3 او 4 اجوان ولا حتى يتفقوا كل فريق يدخل الكورة فى الشبكة مرة

ذادت حملقة الكابتن حمادة

طيب وكمان ليه الذل اللى بيعملوه فى نفسيهم ليه ميمسكوش الكورة باديهم احسن وافضل

احمر وجه حمادة وانتفخت اوداجه وظهرت عليه علامات الغضب

وبقوة دفع الموبايل بتاعى اللى كان معاه رشوة منى دفعه لى وقال

بيتهيا لى يا خالوا انك مشغول دلوقت ومعاك مذاكرة ربنا يكون فى عونك اجيلك مرة تانيه (كان بيتكلم وهو بيجز على اسنانه)

الواد على كخة وابراهيم بكتريا بينادو على

اسف يا خالوا علشان معانا ماتش مهم ولا زم نفوت دلوقت على سيد زلمكة وفتحى تيفود

مشى من امامى وهو يتمتم لا حول ولا قوة الا بالله مفيش منه فايده ضيع نفسه بالدراسات اللى بلا نفسه بيها (برضه هو مقالش كدهع بصراجة لكن فيما معناه )

طبعا زعلت جدا لانى كان نفسى اقابل الابطال العظام اللى ذكرهم

يللا مفيش نصيب

لكن

الا هو صحيح حمادة زعل ليه ؟؟؟؟؟؟؟؟؟؟ --------------------

قانون البقرة 000 أقدم قانون تجكم به مصر

قانون البقرة

هل سمعت عن هذا القانون من قبل

اذا كنت من الكثيرين الذين لم يحالفهم الحظ للتعرف على معلومات حول هذا القانون العبقري

فاكيد انت من الكثيرين جدا الذين حالفهم الحظ وتم استخدامه معهم

خلفية تاريخية

-------------------

هو القانون العبقري

او قل النظرية الرائعة التى تستخدمها معنا الحكومة المصرية منذ السيد الرئيس الراحل بيبي الاول فى عصر الاسرات المتاخرة

وحتى حفيده السيد الرئيس حمادة حسنين امبارك

ومتوقع ان يستمر هذال القانون حتى السيد الرئيس على زكى جمعة جمال حمادة حسنين امبارك

ما هو قانون البقرة

-------------------

قانون البقرة باختصار شديد هو تطبيق او محاكاة لهذه القصة التى ساذكرها حال

ايروى ان حمدان فلاح بسيط من كفر الغلابة - قرية المطحونين - مركز شد حيلك - باحدى محافظات مصر

يحتكم حمدان العلبان على ييجي نص فدان ورثهم عن ابوه الحاج متولى الله يرحمه

تعب فيهم ورعاهم لغاية ما وصلهم لفدانين ونص (بسم الله ما شاء الله )

ومعاهم فضلة خيرك بقرة ( لا مؤاخذة )

فضل العمدة وشيخ الغفر يضايقوا فى عيشته وعيشة ناسه زيه زى باقية اهل البلدويفرضوا عليه الاتاوة ورا الاتاوه وهو يصبر ويقول (يمكن ربنا يعدلها - بكرة تفرج - اهو عمدتنا برضه وهو اولى من الغريب )

لغاية ما الظلم عمى عنيهم وطمعوا فى فدانين الارض اللى معاه

واخذوهم منه غصب واقتدار

ومع كده صبر وقال (يا واد مصير الحق يرجع لاصحابه - يمكن ربنا يعدلها - بكرة تفرج - اهو عمدتنا برضه وهو اولى من الغريب )

وبعد يومين خبطوا عليه اتنين غفر فى ليلة سووخة وقالولو بكرة الصبح تلملم كراكيبك تغور وتنكشحمن هنا

لان العمدة عاجبه موقع دوارك وناوىياخده

حمدان = يا ناس دوارى وبيتى حرام عليكم

الغفر = بتقول ايه يا وله انت فاكر ان العمدة محتاجلك واللا فاكره محتاج لك .. يا حمار العمدة عاوز مصلحتك ومصلحة البلد

العمدة هيعمل مشروعات وطنية وقومية فى البلد

حمدان == هيعمل ايه يعنى

الغفر = كافى شوب وانترنت كافيه وترابيزة بلياردو على اتنين بلايستيشن ووصلة دش علشان يخدم اهل البلدويساعد فى القضاء على البطالةويدخل البلد عصر التكنولوجيا والفضائيات والنت

خبط حمدان ايد على التانيه وقال = حكمتك يا ربحسبنا الله ونعم الوكيل

خرج قبل الفجر ومعاه كراكيبه وبقرته وكانت كل اللى فاضله من الدني

مشى حمدان حزين وهيموت حسرة من الظلم

وعلى الجانب الاخر من الاحداث

العمدة شخط فى شيخ الغفر وقاللو = عملتوا ايه فى الواد حمدان

شيخ الغفر = غار من البيت وخد كراكيبه وبقرته معاها

نفجر العمدة فيه غاضبا = يا ابن الفرطوسة ولما انت عارف ان معاه بقرة يا بقرةمخدتهاش منه ليه

انت مش عارف ان احنا عاوزين بقرة تحلب لبن علشات الكابتشينوا اللى هنعملوا فى المشروع القومى للقرية الذكيه بتاعتنا

شيخ الغفر = راحت على يا كبير معلش انا جاموسة انا بقرة

العمدة = فز غور اتصرف خدها منه

بعت شيخ الغفر اتنين من مطاريد الجبل يقطعوا الطريق على حمدان

بص حمدان لقى اتنين ماسكين بنادق طلعولو من نص الطريق قالو له = انت رايح فين

حمدان = غاير .. ماشي هاجج ... سايب البلد باللى فيها

قالولو= - انت مش عارف ان بتعمل ايه

حمدان = باعمل ايه يعنى .. مطرود ومظلوم

قالولو = انت مش عارف ان اللى يعدى من الطريق ده فى الساعة دى ومعاه بقرة او حمار يحصل ايه

حمدان = يحصل ايه يعنى

قالولو = يتقتل فى الحال ويتاخد حماره او بقرته

نظر حمدان باستغراب وقال == فى شرع مين ده

قالولو = القانون يا محترم القانون انت متعرفش القانون ولا ايه

حمدان مستغيثا = يا نااااااس ..يا هووووو .. حرام عليكوو

المطاريد = مفيش فايده اتشهد على روحك

ومرة واحدة ظهر شيخ البلد

شيخ البلد = فيه ايه يا ولا منك له

حمدان = الحقنى يا شيخ البلد الحقنى هيموتوتنى .. هيقتلووونىىى

شيخ البلد == فيه ايه يا رجاله

وحكو له الموضوع

وقف شيخ البلد مبرما لشنبه قائلا والله يا اخونا طالما ان ده قانون يبقى القانون لازم يحترم

لكن انا شايف ان احنا نحاكمه ونعمل له محكمة سريعة ( تيك اوى) علشان ظروفه

حمدان = ايوه يا شيخ البلد محاكمة قلهم يحاكمونى ، انا عاوز اتحاكم ، حاكمونى يا ناس

شيخ البلد = وانا اللى هدافع عنه بنفسى

انبسطت اسارير حمدان وتنفس الصعداء وقال = ينصر دينك يا شيخ البلد .. ربنا يكرمك يا شيخ البلد .. ربنا يخليك لينا يا شيخ البلد ..

قام شيخ البلد نافخا صدره == يا سيادة المطاريد ، بما ان الواد حمدان حمار وعبيط وميعرفش فى القانون وبما انه اول مره يعمل كده انا شايف ان احنا نخفف له الحكم شوية والتمس من عدالتكم ان حمدان يغور لسبيل حالة وكفايه انكم تاخدوا البقرةن

ظر المطاريد كل واحد للتانى

وقالو = حكمت المحكمة حضوريا على حمدان العبيط الغلبان ان احنا كفاية ناخد بقرته ويروح هو لحال سبيله

نط حمدان فرحان

يحى العدل

يحي العدل

يحي العدل

الله اكبرالحمد لله يا رب

ومشى حمدان فرحان وكل ما يقابل واحد يزغرد ويقول له انا براءه

براءه

ربنا يخلى العمدة

ربنا يكرمك يا شيخ الغفر

كنت هروح فى شربة ميه

لولا حكومتنا الله يديها الصحة

انتهت

ومن يومها تحكم مصر والمصريون بنظرية البقرة

نسبة للبقرة بتاعة الواد حمدان

حد فهم حاجه

اللى فهم يقول

علشان انا مش فاهم حاجة